2Cor 12 | BOJ | STEP | Ariya e gam bei saibqo deqa e olo ijo ñam soqtqai. Bole, e ijo ñam soqtqai kumbra dena iga aqaryaigwa keresai. Di uŋgum. Nami Tamo Koba Qotei na ŋeiobilqei ti uli anjam ti e osorbej deqa niŋgi saiŋgit quiye. Dena e ijo ñam soqtqai.

2 Corinthians 12

Qotei na ŋeiobilqei ti uli anjam ti Pol osoryej

1 Ariya e gam bei saibqo deqa e olo ijo ñam soqtqai. Bole, e ijo ñam soqtqai kumbra dena iga aqaryaigwa keresai. Di uŋgum. Nami Tamo Koba Qotei na ŋeiobilqei ti uli anjam ti e osorbej deqa niŋgi saiŋgit quiye. Dena e ijo ñam soqtqai. 2 Ŋeiobilqei agiende. Nami wausau 14 koboej endi Qotei na Kristus aqa tamo bei osi oqsiqa torei laŋ qureq oqej. Laŋ qure di tulaŋ goge koba. Tamo oqej qaji di e qalie. Tamo di agi e segi. A jejamu korbi oqej kio aqa jejamu uratosiq oqej kio di e qaliesai. Qotei a segi qalie. 3 E qalieonum, Qotei na tamo di osi oqsiqa laŋ qureq oqej. A jejamu korbi oqej kio aqa jejamu uratosiq oqej kio di e qaliesai. Qotei a segi qalie. A laŋ qureq oqsiq dia anjam bei quej. Anjam di aqa damu tamo bei na ubtsim marqa keresai. Anjam di marqajqa getento koba. 5 E tamo di aqa ñam soqtqai. Ariya e ijo segi ñam soqtqasai. E siŋgila saiqoji unum deqa segi marsiy ijo ñam soqtqai.

6 Bole, e ijo segi ñam soqtqai di e nanari tamo sqasai. Di kiyaqa? E anjam bole segi marqai. Ariya e ijo segi ñam soqtqa uratonum. Di kiyaqa? Tamo naŋgi ijo areqalo dauryosib ijo ñam laŋa soqtetbo uge. Ariya naŋgi ijo kumbra unoqnsib anjam e palonteqnum qaji di quoqnsib dena ijo ñam soqtetbqab di kere.

Qotei na gulube tulaŋ uge sil luwit bul qariŋyonaq Pol aqa jejamuq aiej

7 Qotei na kumbra tulaŋ boledamu e osorbej. Ariya e kumbra di unsiy deqa ijo segi ñam soqtosiy diqosiy laaim deqa Qotei na gulube tulaŋ uge sil luwit bul qariŋyonaq ijo jejamuq bej. Gulube di Satan na ojsiqa dena e ugeugeibeqnu. 8 Deqa e endegsi siŋgila na Qotei pailyoqalubtem, “O Abu, ni na gulube di olo taqal atetbime.” 9 Onaqa Qotei a saidosiq endegsi merbej, “E ni qa are boleiboqnimqa ni siŋgilatmoqnqai dena ni keretmqas. Di kiyaqa? Ni siŋgila saiqoji unum deqa ijo siŋgila ni qa brantoqnsim ni siŋgilatmoqnqas.” Qotei na e degsi merbej. Deqa e siŋgila saiqoji unum deqa areboleboleiboqnqas. Yim Kristus aqa siŋgila ijoq di sqas. 10 Deqa e Kristus aqa ñam qa siŋgila saiqoji sqai kio tamo qudei naŋgi na e misiliŋboqnqab kio e gulube oqnqai kio jeu tamo naŋgi na e ugeugeiboqnqab kio e waukobaoqnqai kio di uŋgum. E deqa areboleboleibqas. Di kiyaqa? E siŋgila saiqoji sqai bati di e Kristus aqa siŋgila ti sqai.

Pol a Korin naŋgo areqalo Yesus qa siŋgilateb qaji di olo siŋgilatetnjrqajqa deqa marej

11 Anjam e mareqnum endi nanari anjam. Di nuŋgo une. Agi niŋgi na ijo areqalo tigeltetbeqnub deqa e nanari anjam endi mareqnum. Niŋgi ijo kumbra bole qa marqa kere. Ariya niŋgi marqa urateqnub. Deqa e segi ijo kumbra bole qa mareqnum. Bole, e tamo bolesai. Ariya niŋgi na olo tamo qudei naŋgo ñam soqtoqnsib mareqnub, “Tamo naŋgi di Qotei aqa wau tamo bolequja.” Ariya tamo naŋgi dena e buŋbosai. 12 Agi e nuŋgo ambleq di sosimqa e maŋwa gargekoba babteqnam dena niŋgi qalieeb, Qotei na e qariŋbej. Agi e siŋgila na tigeloqnsim gulube qoboiyeqnam dena maŋwa ti wau siŋgila ti gargekoba nuŋgo ambleq di brantoqnej. Kumbra dena niŋgi osorŋgej, e Qotei aqa wau tamo bole. 13 Kumbra e qure qureq dia Kristen tamo uŋgasari naŋgo ambleq di yeqnum qaji di e nuŋgo ambleq di dego yoqnem. Ariya kumbra qujai e nuŋgo ambleq di yosai qaji agiende. E niŋgi gulube eŋgwa uratosim deqa e niŋgi silali iŋgi iŋgi qa merŋgosaioqnem. Di e une yoqnem e? Sai. Ariya e une yoqnem bole edegosib ijo une di olo kobotetbiye.

14 E nami niŋgi qa boaiyeltem. Ariya bini e olo niŋgi qa bqajqa are qaleqnum. E niŋgi qa bqai di e niŋgi gulube eŋgwasai. E nuŋgo iŋgi iŋgi oqajqa are qalqasai. E niŋgi segi oqajqa are qalqai. Niŋgi qalie, aŋgro naŋgi na naŋgo ai abu naŋgi qa silali koroiyosaieqnub. Ai abu naŋgi na naŋgo aŋgro naŋgi qa silali koroiyeqnub. 15 E na ijo iŋgi iŋgi kalil ti ijo jejamu dego niŋgi torei eŋgwajqa areboleboleibqo. E niŋgi tulaŋ qalaqalaiŋgeqnum. Ariya kiyaqa niŋgi kamba olo e kiñala segi qalaqalaibeqnub?

16 Ariya niŋgi qudei ijo kumbra qa endegsib mareqnub, “Bole, Pol a gago iŋgi iŋgi boleq na yaigosaioqnej. Ariya a na iga walawalaigoqnsiq gago iŋgi iŋgi gisaŋ na yaigoqnej.” 17 O was qu, e nami Kristen was qudei naŋgi qariŋnjrnam niŋgi qa gileb. Naŋgo baŋ na e na niŋgi gisaŋgem kio nuŋgo iŋgi iŋgi laŋa yaiŋgem kio? Sai. 18 E na Taitus minjnam a niŋgi qa gilej. E Kristen was bei di dego qariŋyonam a Taitus dauryosiq ombla na gileb. Gilsib Taitus a niŋgi gisaŋgosiq nuŋgo iŋgi iŋgi qudei bajiŋej e? Sai. Aqo Taitus wo areqalo qujai ti sosim gam qujai dauryosim kumbra bole segi yoqnem.

19 Niŋgi gago anjam kalil endi sisiyosib iga qa endegsib are qalaib, “Naŋgi anjam neŋgreŋyeqnub di naŋgo segi jejamu une saiqoji qa marsib deqa neŋgreŋyeqnub.” Di sai. Iga Kristus aqa tamo deqa iga Qotei aqa ŋamgalaq di anjam endi neŋgreŋyeqnum. O ijo was bole, anjam kalil iga neŋgreŋyeqnum qaji endi niŋgi siŋgilatŋgwajqa deqa neŋgreŋyeqnum. 20 Di kiyaqa? E niŋgi qa ulaeqnum. E niŋgi qa bosiy nuŋgo kumbra unsiy e niŋgi qa areboleboleibqas kio sai kio? Niŋgi dego ijo kumbra unsib niŋgi e qa areboleboleiŋgwas kio sai kio? E deqa ulaeqnum. E niŋgi qa bosiy nuŋgo kumbra endegsi unqai kio? Niŋgi anjam na qoteqnub. Niŋgi nuŋgo was naŋgi qa are ugeiŋgeqnu. Niŋgi minjiŋ oqeqnu. Niŋgi pupoeqnub. Niŋgi nuŋgo was qudei naŋgi misiliŋnjreqnub. Niŋgi yomueqnub. Niŋgi diqeqnub. Niŋgi Qotei aqa wau ugeugeiyeqnub. E degsi unqai kio? 21 E olo niŋgi qa bosiy nuŋgo ambleq di tamo gargekoba nami une yoqneb qaji naŋgi are bulyosaiunub degsi unqai kio? Degsi unqai di ijo Qotei a nuŋgo ŋamgalaq di e jemai ebqas. Tamo naŋgi di naŋgo une nami yoqneb qaji agiende. Naŋgi kumbra uge jiga ti yoqneb. Naŋgi sambala kumbra yoqneb. Naŋgi kumbra uge yqajqa are prugnjroqnej. E niŋgi qa bosiy tamo naŋgi di naŋgo une olo qoreiyosai degsi unqai di e naŋgi qa are gulubeibqas. E deqa ulaeqnum.